Pandan Konsèy Prezidansyèl Tranzisyon an prèt pou eklate akoz akizasyon koripsyon sou do twa (3) nan manm li yo, plizyè sektè nan lavi nasyonal la ap mete tèt ansanm pou jwenn yon solisyon ki ka bwè. Se ka yon ansanm òganizasyon fanm ak feminis ki sipòte nominasyon ansyen Minis Marjory Michel pa Akò 21 desanm nan pou ranplase Louis Gérald Gilles, ki gen akizasyon koripsyon sou do l.
Plizyè òganizasyon fanm ak feminis atravè peyi a eksprime gwo enkyetid yo an rapò ak eskandal koripsyon sa a e yo swete se Marjory Michel ki okipe chèz Louis Gérald Gilles.
« Nou menm, òganizasyon fanm ak feminis ki siyen anba a atravè peyi a, ki reprezante plis pase 200 regwoupman aktif, ini nan batay pou egalite ant sèks, enklizyon, parite, ak jistis sosyal, nou resevwa ak satisfaksyon chwa yon fanm pami de pretandan yo pou ranplase Louis Gérald Gilles e nou eksprime atravè lèt sa a plen sipò nou pou Madan Marjory Michel pou nominasyon l nan Konsèy Prezidansyèl Tranzisyon an (CPT) pa akò 21 desanm nan », nou ka li nan yon kominike tout òganizasyon sa yo pibliye ki date 18 septanm 2024.
Pandan y ap salye inisyativ sa a pou ranplase Louis Gérald Gilles nan Konsèy la pa yon fanm, òganizasyon sa yo plenyen sou fèb reprezantasyon fanm nan enstans desizyon sa a ak absans fanm pami 7 vwa deliberativ konsèy la. « Kounye a, nou konstate se yon sèl fanm ki chita pami nèf manm yo, e li pa gen dwa vòt, sa ki se yon anomali regretab nan rechèch yon gouvènans enklizif e paritè », òganizasyon sa yo deplore.
Pami 200 òganizasyon fanm ak feminis ki siyen kominike sa a gen Platfòm fanm pou epanouyisman ak devlopman depatman Nip; Kowòdinasyon gwoupman fanm an aksyon pou devlopman Arno; Gwoup aksyon pou emansipasyon fanm Ayiti. Yo tout swete Marjory Michel pran plas Louis Gérald Gilles nan Konsèy Prezidansyèl Tranzisyon an.
Hebdo24 est un journal en ligne qui fait de la permanence mais aussi la rigueur dans le traitement de l’information son cheval de bataille.
Tout atik li yoLi tou
Somè mondyal: minis Sandra Paulemon mande pou Ayiti antre plis nan touris Karayib la
sa gen 12 èdtan
Frap salvadoryen: rezidans Jeff Gwo Lwa kraze, Nayib Bukele di se yon «kado» pou pèp ayisyen pou Vètyè
18 nov
Hebdo24 renouvle idantite vizyèl li ak yon nouvo logo ki pi modèn
12 nov
Ayiti-Eleksyon: Jean Ernest Muscadin demisyone nan pòs chèf pakè Miragwàn
6 nov





