Sœurette Bruno chante pou l amize tèt li e amize lòt moun

Sœurette Bruno, ki fòme kòm enfimyè, pa lage pasyon li pou mikwo a. Natif natal Leyogàn nan kontinye ofri tèt li bay yon piblik ki toujou piti, men li gen anbisyon pou l vin yon chantèz renome ki, ak vwa li, ka transmèt mesaj enpòtan e amize moun.

Pakou li

Sœurette Bruno fèt 20 mas 1997 nan Sitwonye, Leyogàn. Li se dènye pitit fi nan yon fanmi 12 timoun. Apre etid primè li nan Lekòl nasyonal Darbonne, li ale nan Lise Anacaona Leyogàn pou etid segondè li. Lè l fin jwenn diplòm fen etid segondè li, li ale nan « Help School of Nursing » kote li jwenn diplòm li nan Syans enfimyè.

Li renmen mizik, li se fanatik Rutshelle ak Emmeline Michel; men Soeurette se anvan tout bagay yon moun ki pasyone pou aprann e ki kwè fèm edikasyon esansyèl. Pou chantèz la, mizik se plis pase yon senp divètisman; se yon mwayen tou pou aprann e transmèt mesaj enpòtan.

Karyè mizikal li

Soeurette kòmanse karyè mizikal li a laj 16 an. A 19 an, li genyen konkou Nwèl radyo Educ Fm te òganize nan vil kote l fèt la. Yon ane apre, li fè yon poz estratejik nan mizik pou l fini etid inivèsitè li. Finalman, li tounen nan pasyon li a 25 an, detèmine pou l fè karyè.

Nan repètwa li, Soeurette gen de repriz: « Secret » Louane ak fameuz cover li fè sou chante « Des milliers de je t’aime » Slimane, kote li te jwenn otorizasyon atis la. Premye tit li ki gen videyo klip, ki rele « Se vre », ki te soti an 2023, denonse vyolans konjigal e li preche emansipasyon fanm.

Soeurette Bruno gen anpil prestasyon nan evènman nan vil kote l fèt la: maryaj, fèt anivèsè… Li te chante tou nan plizyè gwo evènman tankou yon konsè ak Jean Jean Roosevelt ak dènye Dîner en Blanc nan plaj Boucanier, e li te prete vwa li tou pou chante « Ochan pou MIKA », yon omaj pou defen chantè ayisyen Michael Benjamin (MikaBen), an kolaborasyon ak plizyè lòt atis leyoganè.

Jodi a, enfimyè a ap anseye nan lekòl kote li te jwenn diplòm li, pandan l ap pratike lanmou li toujou genyen an, mizik. Sœurette Bruno ap travay pou l kite mak li nan mizik ayisyen e reyalize rèv li pou l konkeri piblik entènasyonal la. Pwochen pwojè li se sòti premye EP li, fanatik li yo ap tann anpil.

Sous: Célébrité Magazine