Sèvis entènèt Digicel retabli, kliyan yo ap jwenn ranbousman

Nan yon nòt pou laprès li pibliye dimanch 22 septanm 2024 sa a, konpayi telefòn mobil Digicel anonse teknisyen li yo fin repare kab entènasyonal fib optik ki te domaje depi 14 septanm pase a, e tout sèvis li yo retabli nèt.

« Digicel vle remèsye anvan tout bagay fidèl kliyan li yo ki te montre pasyans, sipò e sitou konpreyansyon apre ensidan vandalis sa a. Konpayi a eksprime rekonesans li tou pou teknisyen li yo ak patnè li Cable & Wireless ki te fè gwo efò pou fè reparasyon yo », nou ka li nan nòt sa a.

Konpayi Wouj e Blan an remèsye tou otorite Leta yo, sitou Konsèy prezidansyèl la, Primati a, ministè Travay piblik ak Telekominikasyon, ministè Lajistis ak Sekirite piblik, Conatel, Polis Nasyonal la ak medya yo pou akonpayman yo pandan ensidan sa a. Li rasire kliyan li yo l ap kontinye konpansasyon ak ranbousman yo, e l ap kominike pandan tout semèn k ap vini an.

« Ensidan konsa pa dwe janm rive ankò, e Digicel ap kontinye kolabore ak tout otorite konpetan yo pou pwoteje kab sa a ki estratejik pou peyi a », dokiman an fini.