Ayiti-Sante: espektr grèv la toujou ap ante Lopital jeneral

Apre plis pase yon mwa grèv, anyen pa mache nan pi gwo sant lopital piblik peyi a. Menm si responsab sendika lopital la te anonse yon trèv depi 31 mas pase a, Lopital Inivèsite Leta d Ayiti gen difikilte pou l jwenn ritm li e li riske lòt mouvman pwotestasyon.

Kabann kraze depoze nan lakou a. Machin ki gen plak sèvis Leta pake. Nan antre sèvis ijans lan, kèk ra anplwaye chita trankil.

Byenveni nan pi gwo sant lopital piblik kapital la ki te an grèv depi fen fevriye pase a.

Pandan responsab sendika lopital la te anonse yo leve grèv la apre yon rankont ak otorite sanitè yo, jiska jedi 7 avril, aktivite yo toujou kanpe.

Jacquelyn, ki anplwaye depi 27 an nan lopital la, di li pa konprann levasyon grèv sa a.

« Se yon trèv ki fèt sou bouch », sitwayen nou te rankontre nan sèvis ijans lan lanse, tankou pou l minimize desizyon grevis yo.

An efè, pa gen okenn siy ki montre yon retou nan nòmal. Sal yo vid. Okenn sèvis pa fonksyone. Doktè yo, sitou rezidan yo, absan.

« Gade pou kont nou. Anyen pa pase isit la. Se tankou nou toujou an grèv », yon lòt anplwaye deklare.

Si grevis yo te jwenn yon antant ak otorite sanitè yo pou fini grèv la, poukisa aktivite yo toujou paralize nan Lopital jeneral? Plis pase yon moun ap poze tèt yo kesyon an.

« Si anyen pa mache jiska prezan nan lopital la malgre yo leve grèv la, se paske doktè rezidan yo deside pa vin travay, paske depi 8 mwa yo pa resevwa salè yo », Evlyne Fremont, prezidan sendika a, eksplike.

Desizyon sendika a pou leve grèv la pa fè linanimite nan sektè a. Anplwaye Lopital jeneral ak lòt lopital piblik eksprime mekontantman yo sou retrè sa a.

« Pou lanse grèv la, yo te kontakte nou, men pou leve l, se nan radyo nou aprann nouvèl la », yon anplwaye yon lòt sant lopital piblik, nou p ap site non l isit la, denonse.

Gen bri k ap kouri ki di responsab sendika a te resevwa lajan anba tab e yo te negosye pòs ak otorite yo pou yo fè bak. Evelyne Fremond rejte enfòmasyon sa a ak tout fòs li.

« Mwen tande rimè ki fè kwè nou te resevwa lajan nan men otorite yo pou fini grèv la. Sa pa vre ditou », Evelyne ensiste, e li defye nenpòt moun pou pwouve alegasyon sa a vre.

Evelyne Fremond vle rasire moun. « Non, batay la pa vann », li kenbe fèm, pandan l afime materyèl deja kòmanse rive nan lopital la, menm si yo pa vizib, omwen pou kounye a.

Kabann, matla, oksijèn, sewòm, se yon lopital ki manke tout bagay jiska prezan, malgre pwomès otorite nan ministè Sante piblik ak Popilasyon te fè.

Pandan dout ap plane sou rekòmansman aktivite yo nan Lopital jeneral, doktè rezidan yo ap menase antre an grèv pou mande 8 mwa salè yo dwe yo. Kidonk, HUEH poko soti nan tèt chaje!