Oktòb Woz: MAEC òganize yon jounen sansibilizasyon ak depistaj kansè tete

Ministè Afè etranjè ak Kilt (MAEC) òganize, madi 20 oktòb 2026, nan lokal li Pòtoprens, yon jounen sansibilizasyon ak depistaj kansè tete pou pèsonèl li. Inisyativ sa a fèt an kolaborasyon ak Groupe de Support Contre le Cancer (GSCC), nan kad kanpay Oktòb Woz la.

De fanm ki siviv kansè tete, youn se yon reprezantan GSCC e lòt la se yon kad nan Chanselri a, bay temwayaj yo devan pèsonèl ki te prezan an.

Nan entèvansyon li, minis Afè etranjè ak Kilt la, Raina Forbin, ensiste sou enpòtans prevansyon ak depistaj. Li ankouraje pèsonèl la pou yo bay sante yo plis atansyon.

« Nan mwa oktòb sa a, ki konsakre pou sansibilizasyon sou kansè tete, mwen te vle pou nou reyini isit la, nan Chanselri a, otou yon kòz ki konsène nou tout: sante, prevansyon e, sitou, lavi », minis la deklare.

Inisyativ sa a fè pati kanpay Oktòb Woz la, ki konsakre pou sansibilizasyon sou kansè tete ak pwomosyon depistaj bonè, ki esansyèl pou amelyore chans pou trete moun nan e pou l siviv.

Enpak kansè tete a an chif

Dapre estimasyon Sant entènasyonal rechèch sou kansè (CIRC), ki rattache ak Òganizasyon mondyal sante (OMS), Ayiti te anrejistre anviwon 1 952 nouvo ka kansè tete nan fanm ak 880 moun ki mouri akoz maladi sa a an 2024. Sou plan mondyal, yo te estime anviwon 2,3 milyon nouvo ka ak 666 000 moun ki mouri an 2022, dapre done OMS.

Chif sa yo raple gwosè maladi sa a ak enpòtans sansibilizasyon, depistaj bonè ak aksè nan swen.

Moïse François