Deja uit moun mouri ak kolera, MSPP ap mache

Ministè Sante piblik ak Popilasyon (MSPP) anonse, nan yon pwen pou laprès dimanch 2 oktòb 2022 sa a, kolera vrèman tounen ann Ayiti. Deja, yo konte uit moun mouri, yo idantifye yon ventèn ka sispèk, e yo detekte de fwaye nan zòn metwopolitèn Pòtoprens.

« Nou poko kapab konte kantite moun ki mouri yo, paske gen moun maladi a touye ki pa t gen aksè nan sant sante », Direktè jeneral MSPP a, Dr Lauré Adrien, presize.

Sepandan, fòk nou di ministè Sante piblik ak Popilasyon an ap kreye konfizyon, paske pandan menm pwen pou laprès la, minis Alix Larsen te pale de yon sèl moun ki mouri.

An tou ka, MSPP di li pwoaktif lè l anonse l ap louvri yon envestigasyon nan kominote yo pou detekte nouvo ka ki ka genyen e limite fwaye yo.