Evazyon nan prizon sivil Mibalè, echèk KPT ak Gouvènman an ap konfime pi plis chak jou

Kisa Konsèy prezidansyèl tranzisyon an ak Gouvènman Alix Didier Fils-Aimé a vo? An tou ka, pa anpil bagay lè n gade dènye evènman Mibalè yo, kote bandi ame chase popilasyon vil sa a e provoke yon evazyon nan prizon sivil la. Yon lòt fwa ankò, gang ki reyini nan koalisyon « Viv ansanm » nan mete ekip Fritz Jean ak Alix Didier Fils-Aimé ak moun pa yo an dewout.

Si se pa yon plan k ap egzekite, fòk nou kwè gason ak fanm ki sou pouvwa yo se pi gwo enkonpetan, pi gwo enkapab nan tout istwa Ayiti. Zòn, vil ap tonbe anba kontwòl bandi yo youn apre lòt san otorite yo pa reyaji yon fason ki pwopòsyonèl pou mete malfektè yo nan kondisyon pou yo pa fè mal ankò. Sa fè moun kwè, ak rezon, otorite yo konplis gang ame yo.

Tout kont fèt, si popilasyon an pa revòlte, « plan makab » la ap egzekite fasil e tout peyi a ap anba lòd malfektè. Yon bagay sèten: se pa ni Konsèy prezidansyèl tranzisyon an, ni Gouvènman an ki pral mete fen nan monte pouvwa gwoup kriminèl yo, pou retabli lapè nan peyi a.