Ballon d’Or fanm 2026: Melchie Dumornay fini nan katriyèm plas

Entènasyonal ayisyèn Melchie Daëlle Dumornay, yo rele Corventina, fini nan katriyèm plas nan klasman Ballon d’Or fanm 2026 la. Seremoni remiz pri yo te fèt lendi a nan London Palladium, Lond, nan Angletè.

Jwèz OL Lyonnes lan monte 14 plas konpare ak edisyon anvan an, kote li te fini nan 18yèm pozisyon. Pwogresyon sa a montre jan l ap monte sou sèn entènasyonal la e li konfime estati li pami gwo figi foutbòl fanm.

Sepandan, Melchie Dumornay pa t nan seremoni an. Klib li a te prefere prepare pwochen match kont Inter Milan, ki prevwa pou madi 27 oktòb, nan kad Lig chanpyon fanm lan. Kidonk, Grenadyè a pa t vwayaje Lond pou l asiste remiz pri yo.

Pakou ak pwogresyon Corventina

Melchie Dumornay fèt 17 out 2003 Mibalè. Li te fè non l ann Ayiti anvan l kontinye karyè li aletranje. Apre li te pase nan Stade de Reims, li antre nan Olympique lyonnais an 2023. Depi lè sa a, kalite teknik li, vitès li ak efikasite li nan atak pèmèt li enpoze l piti piti nan klib fransè a.

Anplis pèfòmans li nan klib, Corventina te klere tou ak seleksyon ayisyen an. Li te patisipe nan Koup di Mond fanm 2023 la, premye fwa nan listwa Ayiti te patisipe ladan l. Sou sèn ewopeyen an, li resevwa plizyè distenksyon endividyèl tou, tankou pi bon jèn jwèz Lig chanpyon fanm lan an 2024.

Lè l pase de 18yèm plas an 2025 a katriyèm an 2026, Melchie Dumornay franchi yon nouvo etap nan karyè li. Menm si li pa genyen trofe a, klasman sa a se yon gwo rekonesans pou pèfòmans li, e li ede ranfòse vizibilite foutbòl ayisyen sou sèn entènasyonal la.

Moïse François