1ye me: Alix Didier Fils-Aimé montre priyorite li ant sekirite, pwodiksyon nasyonal ak eleksyon

Nan okazyon Jounen nasyonal 1ye me, ki te gen pou tèm ane sa a « Pwodiksyon nasyonal se potomitan batay pou sekirite », Premye minis Alix Didier Fils-Aimé prezante gwo oryantasyon aksyon li, ki santre sou retablisman sekirite, relans pwodiksyon nasyonal ak preparasyon pwosesis demokratik la.

Devan reprezantan sistèm jidisyè a, kò diplomatik la, òganizasyon entènasyonal ak peyizan, ansanm ak aktè sektè prive ak sendika, chèf gouvènman an ensiste sou nesesite pou ranfòse enklizyon ekonomik ak pi byen pwoteje kouch ki pi vilnerab nan popilasyon an.

« Mennen sekirite tounen epi òganize eleksyon, se remèt pèp ayisyen an dwa li pou l viv nan lapè ak diyite »

li deklare, pandan l ap mete aksan sou wòl santral Leta a nan estabilizasyon peyi a.

Seremoni an te sèvi tou kòm kad pou yon gwo omaj pou travayè ak agrikiltè yo, yo prezante kòm poto rezilyans nasyonal la. Premye minis la salye angajman yo lè li souliye:

« Se rekonèt lyen sakre nou ak latè, salye fòs yo ak rezilyans yo. »

Anmenmtan, Ministè Afè sosyal ak Travay (MAST) ak Ministè Agrikilti, Resous natirèl ak Devlopman riral (MARNDR) anonse pwogram akonpayman ki vize sitou agrikiltè yo, popilasyon vilnerab yo ak ti ak mwayèn antrepriz yo.

Finalman, otorite yo entèprete lefèt seremoni an te fèt nan jaden Palè nasyonal la kòm yon siyal politik, ki montre volonte pou ranfòse piti piti kontwòl espas piblik la epi avanse vè òganizasyon eleksyon jeneral enklizif e demokratik sou tout teritwa a.

Redaksyon Hebdo24 tradui atik sa a apati vesyon orijinal an franse a.