Racing Club de Lens envite U-14 ayisyen yo pou yon sejou espòtif an Frans

Nan yon nòt li pibliye madi 27 oktòb 2026 sa a, Federasyon ayisyen foutbòl (FHF) anonse Racing Club de Lens envite seleksyon nasyonal gason moun ki poko gen 14 an (U-14), ki se chanpyon Challenge Series CONCACAF la an 2026, pou fè yon sejou espòtif an Frans, depi 19 rive 29 novanm k ap vini an.

Envitasyon sa a fè pati echanj ant de enstitisyon yo. L ap bay jèn Grenadye yo okazyon pou yo dekouvri anviwònman yon klib pwofesyonèl e viv yon eksperyans ki diferan de lavi foutbòl yo chak jou.

Pandan sejou sa a, jèn jwè yo ap ka dekouvri nouvo metòd travay, konfwonte lòt reyalite nan foutbòl la, epi anrichi eksperyans espòtif ak imen yo. Imèsyon sa a ka ede yo pwogrese tou e alimante anbisyon yo pou rès pakou yo.

Nan kominike li, FHF eksprime rekonesans li anvè Racing Club de Lens pou opòtinite sa a li bay jèn foutbolè ayisyen yo. Klib fransè a gen bon repitasyon sitou pou kalite fòmasyon li, yon kad ki ka ede ranfòse sa jwè yo deja konnen e kontinye aprantisaj yo.

Federasyon an remèsye tou anbasad Lafrans ann Ayiti pou akonpayman li nan demach pou jwenn viza Schengen pou delegasyon nasyonal U-14 ak U-15 yo. Demach sa yo dwe pèmèt de seleksyon yo kontinye aktivite espòtif yo aletranje.

Pou FHF, inisyativ konsa ede prepare avni foutbòl ayisyen an, paske yo bay jèn talan yo okazyon pou yo aprann, pwogrese e alimante anbisyon yo. Apre tit yo nan konpetisyon CONCACAF la, U-14 yo ap gen konsa yon lòt okazyon pou reprezante Ayiti e kontinye fòmasyon yo nan yon anviwònman pwofesyonèl.

Moïse François