Tansyon diplomatik: Repiblik Dominikèn entèdi seleksyon ayisyen an itilize estad li yo

Nan demen gwo viktwa Grenadye yo nan Santo Domingo (4-1), minis dominiken Espò a, Kelvin Cruz, anonse yon entèdiksyon fòmèl pou seleksyon ayisyen an pa itilize enstalasyon espòtif peyi l yo, akoz ensidan ki te pase apre kout sifle final la.

Gwo polemik sa a eklate anviwon vennkat èdtan apre viktwa Ayiti lakay vwazen karayibeyen li an. Sa ki deklanche sanksyon an se deklarasyon atakan Wilson Isidor te fè devan kamera yo apre match la.

« Ispayola se Ayiti », santravan Grenadye yo te di, li te kontan anpil apre li fin make premye doub nan karyè entènasyonal li. Otorite lokal yo jije pawòl sa yo kòm yon pwovokasyon, epi ministè a ajoute dega yo te obsève nan antre estad Félix Sánchez la.

Bò kote dominiken yo, prezidan Federasyon dominikèn foutbòl la, José Deschamps, wè pawòl sa yo kòm yon atak kont souverènte nasyon l. Luis Abinader, prezidan repiblik la, di gouvènman li sipòte desizyon sa a fèm.

Koze a kounye a ap pran yon tounen enstitisyonèl, paske gen demach ofisyèl k ap fèt bò kote Concacaf ak FIFA. Pandan enstans entènasyonal yo ka gen pou tranche, otorite espòtif ayisyen yo poko pale ofisyèlman sou dosye a.

Jephte Estiverne

Redaksyon Hebdo24 tradui atik sa a apati vesyon orijinal an franse a.