MLS ap adopte yon kalandriye menm jan ak chanpyona ewopeyen yo apati 2027

Major League Soccer (MLS) ofisyèlman anonse yon gwo chanjman nan kalandriye anyèl li. Apati 2027, chanpyona nò-ameriken an ap adopte yon kalandriye ki sanble ak pa plizyè lig ewopeyen, ak yon sezon ki ap jwe depi jiyè rive me.

An efè, apati 2027, MLS p ap jwe ankò depi fevriye rive desanm jan sa te ye depi lig la te kreye an 1996. Kounye a, chanpyona a ap adopte modèl ewopeyen an pou kòmanse sezon an an jiyè. Kidonk, nouvo modèl sa a ap jwe pou premye fwa depi jiyè 2027 rive me 2028.

Pou evite yon twò gwo kanpe apre sezon k ap jwe kounye a, yo prevwa yon sezon espesyal depi fevriye rive me 2027, anvan lòt sezon an lanse an 2027. Sezon tranzisyon sa a ap mete ekip menm konferans yo youn kont lòt, ak 14 match pou chak, anvan faz play-off yo.

Yo ap respekte poz abityèl janvye a nan fen sezon sa a anvan yo atake sezon tranzisyon an. Final sezon sa a prevwa pou 31 me 2027, pandan wikenn « Memorial Day » la.

Chanjman sa a ka mande tou plizyè entènasyonal ayisyen k ap jwe nan lig la pou yo adapte yo ak nouvo kalandriye a. Pami yo, MLS gen Danley Jean Jacques, Fafa Picault, Derrick Jr. Étienne ak Lovend’s Delinois, pou n site kèk reprezantan ayisyen sèlman.

Lig la poko pale de okenn chanjman nan fòma chanpyona a.

Jephte Estiverne