Foutbòl: David Badía pran rèn seleksyon ayisyen an

Federasyon ayisyen foutbòl (FHF) anonse samdi nominasyon David Badía kòm seleksyonè ekip nasyonal Ayiti. Yon anons ofisyèl ki tonbe nan bon moman pou Grenadye yo ki angaje nan Lig Nasyon Concacaf la.

Nan yon ti videyo FHF pibliye sou paj Facebook li pou prezante nouvo seleksyonè a, Badía di premye pawòl li bay sipòtè ayisyen yo ak kri ralye seleksyon an: « Grenadye Alaso! », anvan l ajoute « Men mwen ».

Badía, yon teknisyen panyòl 51 an, te pase kat ane nan akademi FC Barcelone, kote li te antrenè ak dirijan ant 2012 ak 2016. Apre sa, li te antre nan ekip teknik Fenerbahçe ak Almería kòm asistan.

Kòm antrenè prensipal, Badía te deja dirije klib tankou AEK Larnaca, Ethnikos Achna ak Lechia Gdańsk. Li pran kòmand Grenadye yo pandan Ayiti ap louvri yon nouvo chapit apre kalifikasyon li pou Koup dimonn 2026 la anba direksyon Sébastien Migné.

FHF pa bay okenn detay sou dire kontra teknisyen panyòl la ni sou kondisyon finansye angajman li.

Premye tès Badía sou ban Grenadye yo ap fèt nan Lig Nasyon Concacaf la. Ayiti ap jwe kont Trinite-e-Tobago 24 septanm anvan li fè fas ak Kosta Rika 3 jou apre. Gwoup Ayiti a gen ladan l tou Kiraso, Nikaragwa ak Repiblik Dominikèn; de premye chak gwoup ap kalifye pou ka final yo.

Redaksyon Hebdo24 tradui atik sa a apati vesyon orijinal an franse a.